Catūrtdiņ, 4. decembrī, 15 stuņdēs Rēzeknis Centraluo biblioteka i latgalīšu kulturys kusteiba “Volūda” aicynoj kūpā pīraksteit deveitū diktatu latgalīšu rokstu volūdā.
✍️ Diktats oktobra vydā skanēja Latvejis Radejis 1 eterā, svietejūt Vaļsts volūdys dīnu, bet kusteiba “Volūda” sasadorbojūt ar Latgolys bibliotekom aicynoj diktatu raksteit ari piečuok.
✍️ Diktata tekstu skaita Daugovpiļs teatara aktrise Kristīne Veinšteina, bet tekstu “Maize” speciali diktatam pīrakstejuse literarūs miniaturu i fotomuokslys Latgolys sajiutu karteņu “Brīnumdārzs / Breinumu duorzs” autore Evija Piebalga. Raksturojūt ituo gods diktata tekstu, Evija Piebalga soka: “Koč i par maizi ruodīs, ka vyss jau ir pasaceits, tai vysod nu jauna var aplīcynuot uzticeibu. Voi tys byutu rudzu maizis kukuleits, cegleņš voi žagareni – kotram ir sovs raksturs i vīta kai iz kasdīnys, tai svātku golda. Maize vīnoj. Juos garša i smuords atguodynoj sātu i šaļts, kod vysi sēd pi vīna golda – cylvākus, kas myus audzynuojuši, i tū, kas mums eistyn itūšaļt svareigs. Dūmojūt ap diktata tekstu, dūmuoju naviņ par volūdu, bet ari par vierteibu, kū “izgaismuot” ar volūdys paleidzeibu.”
✍️ Miniaturys teksts latgalīšu rokstu volūdā radeits, īvārojūt 2007. godā apstyprynuotūs nūsacejumus.
✍️ Latgalīšu volūdys diktata raksteišonā Rēzeknis Centralajā bibliotekā vysa pyrma gaidoma latgalīšu rokstu volūdys stuņde kūpā ar “Volūdys” kustynuotuoju Edeiti Laimi, bet piec juos vysim kūpā byus vareiba pīraksteit diktatu i piečuok puorrunuot, kai byus guojs.
🔵 Iz nūtikšonu aicynuot kotrys interesents. Pīsadaleišona ir bez īīšonys moksys.
__________
Deveituo diktata latgalīšu rokstu volūdā skaniešonu 18. oktobrī organizēja latgalīšu kulturys kusteiba “Volūda”, latgalīšu kulturys ziņu portals lakuga.lv i Latvejis Radejis Latgolys multimedeju studeja, bet atbaļsteja Sabīdreibys integracejis fonds nu Latvejis Republikys Kulturys ministrejis daškiertūs Latvejis vaļsts budžeta leidzekļu i Vaļsts kulturkapitala fonds.
You may also like the following events from Latgalīšu kulturys kusteiba "Volūda":
Also check out other
Arts events in Turmantas,
Literary Art events in Turmantas.
